د.طارق النجومى يكتب: حدوتة مصرية

د.طارق النجومى يكتب: حدوتة مصرية


الأربعاء، 8 ديسمبر 2010 - 20:06
[ندعوك للتسجيل في المنتدى أو التعريف بنفسك لمعاينة هذا الرابط]
أخذت تطرق الباب عليه.. يللا ياحاج بسرعة الله يسترك.. خرج الرجل وهو يلملم ملابسه.. وجهه شاحب وعيناه ذابلتان.. دخلت بسرعة.. دقائق وسمع صوت هدير المياه وفتح الباب..؟؟
خرجت وجلست بجانبه.. بادرته.. أهوده اللى جالنا ياحاج من الانتخابات وأكل اللحمة..!! أنا بطنى بتتقطع.. الله يخرب بيتهم.. الظاهر اللحمة بايظة يا حاجة..!!؟ ولا يمكن من المحشى..؟؟ منها لله دى كانت شورتها غبره..!!
قال أبو مجاهد وهو يضع يده على بطنه..ألا أخبار جارنا أبو مصيلحى أيه..؟؟ خرج من المستشفى ولا لسه..؟؟ لسه ياحاج وبيقولوا حالته خطرة..!! يستاهل.. قلته اقعد واتلم فى بيتك ولاتروح ولاتيجى..!! صوتك أمانة فى أديهم هما أدرى بالمصلحة..!! ما سمعش الكلام..!! يادوب لسه واقف قدام اللجنة والعركة قامت وما نابه إلا شومة على راسه..!!
بيقولوا يا حاج إن الناس طردوهم من قدام اللجنة وقالولهم يالا روحوا..!! ولا شفتى الراجل أبو منصور..!! الناس بيقولوا شافوه وهو ماسك الاستمارات فى اللجنة وقاعد يعلم عليها ويرميها فى الصندوق..!! بيقولوا واعدينه يشغلوا ابنه بعد الانتخابات..!!
افتحى التليفزيون يا حاجة أهو ننسى شوية اللى إحنا فيه..!! مش قادرة أقوم يا حاج..!! يا ستى مدى إيدك الريموت جنبك..!!
انتهت الجولة الأولى من الانتخابات..وصرح أحد المسئولين بأن الانتخابات شهدت أعلى مستوى من التنظيم والشفافية.. وأن الكلام عن التزوير اتعودنا عليه..!! لا أحد يريد أن يعترف بالهزيمة..!! وصندوق الانتخابات مابيكدبش.. والعنف اللى حصل طبيعى.. بيحصل فى كل دول العالم..!!؟
إيه رأيك فى الكلام ده ياحاج..؟؟ هما أدرى يا حاجة..!!؟ هما شايفين اللى إحنا مش شايفينه..!! من ناحية التنظيم كانت حاجة حلوة..!! اللى ماكان يشترى يتفرج..!! ومن ناحية الشفافية كلام ميه ميه..!! الصناديق اللى كان أبو منصور بيرمى فيها الورق اللى معلم عليه كانت شفافة..!! الكلام ده صح الصح..!!
وقد صرح رئيس وحدة مراقبة الانتخابات بالمجلس القومى لحقوق الإنسان بأن الانتخابات مازالت بعيدة كل البعد عن المعايير الدولية.. وقد توالت أحكام القضاء ببطلان الانتخابات.. ففى محافظة واحدة ألغيت النتائج فى 11 دائرة..!!؟
ومن المفارقات الطريفة أن أحد المرشحين لم يحصل على صوت واحد ولا حتى صوته هو.. وحتى الآن مازال البحث عن صوته جاريا..!!؟ وأفاد أحد المسئولين أن هذا الصوت تم اختطافه وبعد مجهودات جبارة وبحث مستمر تم العثور عليه..!!؟ وتم تحويله للطب الشرعى.. وبعد الكشف أفاد التقرير أن الصوت مازال بكرًا.. وتمت إعادته للصندوق سالما..!!؟
وصرح مصدر مسئول أن العملية الانتخابية تسير بشكل طبيعى ولكن هناك بعض الاحتكاكات البسيطة..!!؟ فى حين صرح ائتلاف عيون لمراقبة الانتخابات أن سعر الصوت وصل من 50 إلى 700 جنيه وأن عدد ضحايا الانتخابات وصل حتى الآن 13 حالة وفاة بطلقات نارية واشتباكات بالأسلحة البيضاء..!!؟
سمعت يا حاجة أن اللى ضربوا أبو مصيلحى من جماعة أبو إبراهيم اللى فى آخر البلد وقرايب أبو مصيلحى بيقولوا مش هيسكوتوا وهياخدوا حقهم ..؟؟
أهو ده اللى خادته البلد من الانتخابات..!! الناس هتعادى بعضها..!! وفى الآخر الباشا النايب لا حد هيشوفه ولا يسمع عنه إلا فى التليفزيون وهو رافع صباعه..!! تصدقى ياحاجة إن فرجة الجلسات بقت أفيونة عندى!!.. بتكيف أوى ساعة ما يرفعوا صوابعهم ويقولوا موافقة..!!
دوت أصوات الدفوف والمزامير والطبل والهتافات.. أحمد بيه.. أحمد بيه.. دخل المجلس ما شاء الله عليه..!! فى حين تصاعدت أصوات الصراخ واللطم والنواح من بيت أبو مصيلحى فقد جاء خبره من المستشفى منذ لحظات..!! فى نفس الوقت سمعت أصوات الزغاريد تنطلق من بيت أبو منصور فقد تم تعيين ابنه فى مجلس المدينة..؟؟
تداخلت الأصوات لتعزف سيمفونية من العبث..!! تحكى قصة تبدو كمأساة أغريقية تتصاعد فصولها وتبدو قريبة من مشهد الختام..!!؟