حسام الجندى يكتب: عايز أعيش

حسام الجندى يكتب: عايز أعيش



الأربعاء، 5 يناير 2011 - 09:48









[ندعوك للتسجيل في المنتدى أو التعريف بنفسك لمعاينة هذا الرابط]




سألتنى العرافة
مين فى بالك؟.. إيه فى خيالك؟
ليه تلف وليه تدور؟

كله باين فى الودع

قلبك وطافح م الوجع

قلتلها قولى يا خالة حالى

احكى وقولى بجد مالى

قالتلى عايش فى بير غويط

والغلب يابنى بيك محيط

والظلم سايب على جبينك أثر

والعيشة مُرّة والظالم فَجَـر

مبقولش يابنى كلام وبس

دى حياه وقلبك بيها حَسّ

غربتنا مُرّة .. وعيشيتنا مُرّة

لو بس تضحك لينا مَرّة

بس من إمتى يابنى والعيشة سهلة

إوعاك تصدق غربتنا جاهلة

غربتنا فاهمة عمايلها فينا

وكله راكب فى السفينة

يمكن فى يوم ترسى بينا

على شط نلقى فيه وطن

على بَرّ نلقى فيه سكن

نرتاح ونلقى فيه أمان

ومنين يا خالة النور يبان؟

قالتلى جاى ولا محالة

سمّى وافتح يابنى قلبك

قول كلامك.. قوم وثور

أخرج بقلبك م الطابور

ده أنت أبوك من جيش العبور

قوم وخدلك يلا دُور

دُورك أنت جاى أكيد

قوم وثور.. خليك عنيد

بس يابنى نفسى أسمعك

مين فى بالك؟.. إيه فى خيالك؟

ليه تلف وليه تدور؟

قلتلها يا خالة صوتى اتنبح

قلبى انجرح

من الكلام ومن السكوت

نفسى أعيش برة التابوت

نفسى أخرج من همومى

نفسى أعيش من نفسى يومى

قالتلى يا بنى وشوش الودع

بأمنية واحدة وخليك جدع

مديت من غلبى إيديا

وشوشته.. قلتله صعبان عليا

كان عندى ليك كلام كتير

بس أعمل إيه حكم القوى.. حكم الكبير

هى كلمة.. غيرها مفيش

يا ودع.. أنا عايز أعيش